महापराक्रमी स्त्रियांचा इतिहास मुलींच्या शिक्षणाचा दीपस्तंभ.

कळंब
महापराक्रमी स्त्रियांचा इतिहास मुलींच्या शिक्षणाचा दीपस्तंभ असे प्रतिपादन शिक्षक महादेव खराटे यांनी केले आहे.

शादीय नवरात्र महोत्सवानिमित्त कळंब तालुक्यातील आढाळा येथील जिल्हा परिषद प्राथमिक शाळा यांच्या वतीने “जागर स्त्रीशक्तीचा सन्मान कर्तृत्वाचा” या पथदर्शक उपक्रमाचा समारोप मोठ्या उत्साहात झाला. उपक्रमशील शिक्षक महादेव खराटे यांनी या पाच दिवसीय कार्यक्रमाचा आढावा घेतला. इतिहासातील पराक्रमी स्त्रियांच्या कार्यगाथा विद्यार्थ्यांसमोर मांडून त्यांना मुलींच्या शिक्षणासाठी प्रेरणा देण्याचा प्रयत्न करण्यात आला.
या कार्यक्रमात राजमाता जिजाऊ, पुण्यश्लोक अहिल्यादेवी होळकर, क्रांतीज्योती सावित्रीबाई फुले, राजमाता येसूबाई, झाशीची राणी लक्ष्मीबाई तसेच माता रमाई यांच्या कर्तृत्वाचे प्रेरणादायी दर्शन घडविण्यात आले.
जिजाऊंनी छत्रपती घडवले, अहिल्यादेवींनी आदर्श कारभार उभा केला, सावित्रीबाई फुले यांनी स्त्रीशिक्षणाची ज्योत पेटवली, येसूबाई यांनी औरंगजेबाच्या कैदेत ३० वर्षे सहन करत स्वराज्य टिकवले, तर लक्ष्मीबाई व रमाई यांनी बलिदान आणि त्यागाचे महान उदाहरण घालून दिले, असे प्रतिपादन महादेव खराटे यांनी हा उपक्रम “मुलींच्या शिक्षणाचा दीपस्तंभ” असल्याचे गौरवोद्गार काढले.
या उपक्रमाच्या यशस्वीतेसाठी मुख्याध्यापक राजेंद्र बिक्कड यांचे कल्पक मार्गदर्शन, सहशिक्षक बलभीम राऊत, तुकाराम कराळे, शिवनंदा स्वामी यांचे योगदान तसेच स्वयंसेवक बापू हगारे यांचे सहकार्य लाभले.
गावातील महिला भगिनींचा मोठ्या संख्येने सहभाग लाभल्याने हा उपक्रम सर्वांच्या मनात ठसा उमटवून गेला. जिल्हा परिषद प्राथमिक शाळा, आढाळा यांच्या या स्तुत्य उपक्रमाचे सर्वत्र कौतुक होत आहे.