लाखो भाविकांकडून पारंपरिक चुना वेचण्याचा सोहळा संपन्न
कळंब
तुळजाभवानी मातेची धाकटी बहिण समजल्या जाणाऱ्या कळंब तालुक्यातील येरमाळा येथील येडेश्वरी देवीच्या यात्रेत भक्तीचा महासागर उसळला. “आई राजा उदो उदो”चा गजर, संबळाचा कडकडाट आणि आराधी गीतांच्या तालावर तब्बल १८ लाख भाविकांनी पारंपरिक पद्धतीने चुना वेचत देवीच्या चरणी माथा टेकवला.
श्री क्षेत्र येडेश्वरी देवीच्या चैत्र पौर्णिमा यात्रेतील चुनखडी वेचण्याचा मुख्य कार्यक्रम शुक्रवारी पार पडला. या पारंपरिक सोहळ्यासाठी सुमारे दहा लाख भाविक येरमाळा नगरीत दाखल झाले होते. सकाळी ८.०० वाजता देवीची विधिवत महापंचोपचार पूजा व आरती मानकरी अमोल पाटील, बच्चू पाटील व इतर मानकऱ्यांच्या हस्ते करण्यात आली. त्यानंतर झांज, ढोलकी आणि संबळाच्या गजरात देवीची पालखी मुख्य डोंगरावरील मंदिरातून आमराई मंदिराकडे प्रस्थान झाली.
“आई राजा उदो उदो”च्या जयघोषात भाविक संबळ, झांज व हलगीच्या तालावर तल्लीन होऊन पालखीसमोर नाचत होते. भाविकांची प्रचंड गर्दी लक्षात घेता पोलिस बंदोबस्तात पालखीचा प्रवास संथगतीने सुरू ठेवण्यात आला. सकाळी १०.०० वाजता पालखीने गावात प्रवेश केला. या वेळी गावकऱ्यांनी सड्यांचे शिंपण करून रांगोळ्या काढल्या आणि पालखी मार्गावर फुलांचे अंथरूण घातले.
गावातील मुख्य रस्त्यावरून पालखी जात असताना खांदेकर्यांच्या पायावर पाणी घालून तसेच परशुरामाच्या मूर्तीला चुरमुरे, बत्ताशे व पुरणपोळीचा नैवेद्य अर्पण करण्यासाठी भाविकांनी मोठी गर्दी केली होती. सकाळी ११.०० वाजता पालखी चुनखडीच्या शेतात दाखल झाली. या वेळी भाविकांनी वेचलेले पाच खडे व नैवेद्य पालखीवर अर्पण केला. त्यानंतर दुपारी सुमारे १२.०० वाजता पालखी आमराई मंदिरात विसावली.
या वेळी दर्शनासाठी भाविकांची मोठी गर्दी उसळली होती. देवस्थानचे पुजारी, मानकरी व खांदेकरी पालखी सोबत होते. तसेच आजी-माजी खासदार, आमदार व विविध राजकीय पदाधिकाऱ्यांनीही पालखीचे दर्शन घेतले.
भक्तीत भाविक तल्लीन
मागील काही दिवसांपासून उन्हाची तीव्रता वाढली असतानाही भाविकांचा उत्साह कमी झाला नाही. कडक उन्हातही श्री येडेश्वरी देवीच्या भक्तीत भाविक तल्लीन झाले होते.
आमराईमध्ये मुक्काम
चुना वेचण्याचा कार्यक्रम झाल्यानंतर आई येडेश्वरीची पालखी तेरखेडा मार्गालगतच्या आमराईकडे मार्गस्थ झाली. दुपारी १२ वाजता पालखी आमराईत पोहोचली. पुढील पाच दिवस पालखीचा मुक्काम येथेच असणार असून दर्शनासाठी भाविकांची मोठी गर्दी होत आहे.
हलगीच्या ठेक्यावर नृत्य
यात्रेनिमित्त विविध भागांतून आलेल्या तृतीयपंथीयांमध्येही मोठा उत्साह दिसून आला. हलगीच्या ठेक्यावर नृत्य करत त्यांनी भाविकांचे लक्ष वेधून घेतले.
हेलिकॉप्टरमधून पुष्पवृष्टी
येडेश्वरी देवीची पालखी आमराईत आल्यानंतर आमदार राणाजगजितसिंह पाटील यांच्या वतीने हेलिकॉप्टरमधून पुष्पवृष्टी करण्यात आली.
क्षणचित्रे :
कडक उन्हातही भाविकांचा उत्साह ओसंडून वाहताना दिसला.
पालखीसमोर हळद लावत फुगडी खेळणाऱ्या महिलांची लगबग.
विविध राजकीय पक्षांकडून भाविकांसाठी नाश्ता व पाण्याची सोय.
भाविकांचा दोन दिवसांपासून मुक्काम; राहुट्यांमध्ये वास्तव्य.
खाद्यपदार्थ, थंड पेयांची दुकाने आणि व्यापाऱ्यांची मोठी गर्दी.
