किचनमधील वादातून हाणामारी
कळंब :
शहरातील उबाठा गटाचे नगरसेवक सागर मुंडे यांच्या मालकीच्या प्रेरणा बार अॅण्ड हॉटेलमध्ये काही अज्ञात इसमांनी धुडगूस घालत कर्मचाऱ्यांना बेदम मारहाण केल्याची घटना घडली आहे. या प्रकरणी कळंब पोलीस ठाण्यात गुन्हा दाखल करण्यात आला असून शहरात कायदा व सुव्यवस्थेबाबत प्रश्नचिन्ह निर्माण झाले आहे.
मिळालेल्या माहितीनुसार, १४ मार्च रोजी दुपारी सुमारे २ वाजण्याच्या सुमारास सहा अनोळखी इसम प्रेरणा बारमध्ये आले. त्यांनी दारूच्या बाटल्या घेऊन मद्यप्राशन करत जेवणाची ऑर्डर दिली. दरम्यान किचनमध्ये स्वयंपाक सुरू असताना त्यापैकी एक इसम किचनमध्ये जाऊन तेथील काजू, खोबरे व शेंगदाणे खाऊ लागला. कर्मचाऱ्यांनी त्याला आवश्यक असल्यास ऑर्डर देण्यास सांगितल्याने त्या इसमाने शिवीगाळ करत किचनमधील कर्मचाऱ्यावर हल्ला केला.
त्याने संबंधित कर्मचाऱ्याला मारहाण करून खाली पाडले व कॉलर पकडून किचनमधून बाहेर ओढत आणले. त्यानंतर त्याच्यासोबत आलेल्या इतर पाच जणांनीही लाथाबुक्क्यांनी मारहाण केली. या मारहाणीत कर्मचाऱ्याच्या चेहऱ्यावर, हातावर व डोळ्याजवळ जखमा झाल्या.
दरम्यान हॉटेलचे मॅनेजर परमेश्वर प्रवीण तांबारे, वेटर भारत माने, हेल्पर तौफिक शेख, प्रशांत कुपकर तसेच मॅनेजर अभिजीत सगरे यांनी भांडण सोडवण्याचा प्रयत्न केला असता त्यांनाही मारहाण करण्यात आली. यावेळी एका इसमाने परमेश्वर तांबारे यांच्या हातावर दगडाने मारून त्यांना गंभीर जखमी केले.
यानंतर संबंधित इसमांनी हॉटेलसमोर दगडफेक करत ग्रीलच्या काचा, काचेचे ग्लास व भांडी फोडून अंदाजे ७ ते ८ हजार रुपयांचे नुकसान केले. तसेच दारूचे बिल न देता काउंटरमधील अंदाजे १० ते १५ हजार रुपये हिसकावून नेल्याची तक्रार करण्यात आली आहे.
या प्रकरणी सागर साळुंके व अनिल साळुंके (रा. बार्शी, जि. सोलापूर) यांच्यासह आठ जणांविरुद्ध कळंब पोलीस ठाण्यात गुन्हा दाखल करण्यात आला असून पुढील तपास पोलीस करत आ
