कळंब निवडणूक: गटबाजी, नाराजी आणि सत्ता संघर्षाचा थरार!

सा. लोकाभिमान विशेष
कळंब नगर पालिका निवडणुकीत राजकीय तापमान दिवसेंदिवस वाढत असून, सत्तेसाठीची ही लढाई आता प्रतिष्ठेची बनली आहे. दोन्ही आघाड्यांतील गोंधळ, नाराजी आणि गटबाजीमुळे अंतिम टप्प्यात कोणता गट बाजी मारतो हे पाहणे औत्सुक्याचे ठरेल.

कळंब नगर पालिका निवडणुकी मध्ये रंग भरण्यास सुरुवात झाली आहे. मागील पंचवार्षिक निवडणुकीत राष्ट्रवादी काँग्रेसने एकहाती सत्ता मिळवली होती, तर शिवसेनेला (उबाठा गट) विरोधी बाकांवर बसावे लागले होते. निवडणूक दिर्घ काळानंतर होत असल्यामुळे राजकीय पटलावर लक्षणीय उलथापालथी झाल्या आहेत. पुन्हा एकदा निवडणुकीचा रणशिंग फुंकले गेले आहे. नगराध्यक्ष पद आणि नगरसेवकांचे आरक्षण जाहीर झाल्यानंतर प्रत्येक प्रभागात घटक पक्षांचे इच्छुक कार्यकर्ते सक्रिय झाले आहेत. प्रत्येक नेता स्वतःची  ताकद दाखवत दावेदारी करत असल्याने पॅनल च्या प्रमुख नेत्यांची डोकेदुखी वाढली आहे. अजुनही अनेक भावी उमेदवारांची उमेदवारी निश्चित झालेली नाही, त्यामुळे दोन्ही आघाड्यांमध्ये गोंधळाची परिस्थिती निर्माण झाली आहे.


महायुतीत जागावाटपावर तणाव
महायुतीमध्ये शिवसेना, भाजपा आणि राष्ट्रवादी काँग्रेस (अजित पवार गट) यांची युती असली तरी अंतर्गत मतभेद ठळकपणे दिसत आहेत. शिवसेना आणि भाजपामध्ये जागावाटपावर चर्चा सुरू आहे. तर राष्ट्रवादी काँग्रेस (अजित पवार गट) हे सुध्दा काही जागेसाठी आग्रही आहेत. शिवसेनेचे शहरप्रमुख गजाजन चोंदे व माजी नगरसेवक प्रताप मोरे यांनी शिवसेनेची साथ सोडल्यामुळे शिवसेनेने सावध पवित्रा घेतला आहे.


महाविकास आघाडीतही मतभेद उफाळले
महाविकास आघाडीत शिवसेना (उबाठा गट), काँग्रेस (आय) आणि राष्ट्रवादी काँग्रेस (शरद पवार गट) एकत्र लढत आहेत. मात्र, नगराध्यक्ष पदाच्या उमेदवारीवरून नाराजी उफाळली आहे. राष्ट्रवादी काँग्रेस (शरद पवार गट) नगराध्यक्ष पद आपल्या वाट्याला द्यावे, अशी मागणी करत आहे, तर शिवसेना (उबाठा गट) पद सोडण्यास तयार नाही. यामुळे अनेक प्रभागातील उमेदवारांची उमेदवारी निश्चित झालेली नाही. तर कॉग्रेस ने स्वतहाचे उमेदवार निश्चित करुन कामाला लावले आहेत.


निवडणुकीचे गणित ‘राष्ट्रवादी’भोवती
नगर पालिका निवडणूक मध्ये महाविकास आघाडीतून राष्ट्रवादी काँग्रेस (शरद पवार गट) व महायुती मधून राष्ट्रवादी काँग्रेस (अजित पवार गट) यांना दोन्ही पक्षाला किती जागा मिळतात व त्यानंतर हे दोन्ही राष्ट्रवादी काँग्रेस त्यावर तयार होते का? नाही यावर नगर पालिकेच्या निवडणुकीचे गणित अवलंबून असणार आहे.