कळंब तालुक्यात अफू लागवड उघड, १५ लाखांचा मुद्देमाल जप्त

कळंब
तालुक्यात बेकायदेशीर अफू लागवडीचा धक्कादायक प्रकार उघडकीस आला असून पोलिसांच्या कारवाईने कन्हेरवाडी परिसरात मोठी खळबळ उडाली आहे. कन्हेरवाडी ते मांडवा रस्त्यालगत थेट शेतातच अफूची झाडे लावल्याचा प्रकार समोर आल्याने प्रशासनही सतर्क झाले आहे.

कळंब तालुक्यातील कन्हेरवाडी गावात अफुची शेती होत असल्याची खात्रीलायक माहिती कळंब पोलिसांना मिळाली असता. पोलिसांनी तात्काळ हालचाल करत पोलीस निरीक्षक अजित चिंतले यांच्या नेतृत्वाखाली गट क्रमांक ३१६ मधील शेतावर छापा टाकला. पाहणी दरम्यान मोठ्या प्रमाणावर अफूची झाडे आढळून आली.

घटनास्थळी दोन शासकीय पंच, नायब तहसीलदार आणि कृषी अधिकाऱ्यांच्या उपस्थितीत पंचनामा करून संपूर्ण मुद्देमाल जागेवरच जप्त करण्यात आला. उघडपणे सुरू असलेल्या या बेकायदेशीर लागवडीमुळे कायदा सुव्यवस्थेचा प्रश्न ऐरणीवर आला असून संबंधितांवर कठोर कारवाईची मागणी होत आहे. या प्रकरणी गुन्हा दाखल करण्याची प्रक्रिया सुरू असून पुढील तपास वेगाने सुरू आहे.

१५ लाखांचा अफु..
जप्त करण्यात आलेल्या झाडांचे अंदाजे वजन तब्बल १०० किलो असून बाजारभावानुसार त्याची किंमत सुमारे १५ लाख रुपये असल्याचे प्राथमिक अंदाज व्यक्त करण्यात आले आहेत.