हायवेवर दरोड्याचा डाव उधळला; सात सराईत आरोपी स्थानिक गुन्हे शाखेकडून बेड्या ठोकून गजाआड

  कळंब | प्रतिनिधी
हायवेवरून जाणाऱ्या निष्पाप वाहनचालकांच्या जीवावर उठण्याचा कट स्थानिक गुन्हे शाखेने वेळीच उधळून लावला. दरोड्याच्या तयारीत असलेले सात सराईत आरोपी रात्रगस्तीत रंगेहाथ सापडताच पोलिसांनी थेट कारवाई करत त्यांना बेड्या ठोकल्या आहेत.
कळंब ते केज रस्त्यावरील द्वारकानगरीजवळील बंद पेट्रोल पंप परिसरात दोन पिकअप वाहने थांबवून आरोपी दरोड्याची आखणी करत असल्याची माहिती मिळताच स्थानिक गुन्हे शाखेचे पथक सतर्क झाले. पोलीस वाहन दिसताच आरोपींनी पळ काढण्याचा प्रयत्न केला, मात्र पथकातील अंमलदारांनी क्षणाचाही विलंब न करता पाठलाग करून सर्वांना जागेवरच पकडले.
ताब्यात घेतल्यानंतर आरोपींनी सुरुवातीला पोलिसांची दिशाभूल करण्याचा प्रयत्न केला. मात्र कडक चौकशीसमोर त्यांचा बनाव टिकला नाही. चंदर भास्कर काळे, सुभाष उर्फ हरी भारकर काळे, शामसुंदर विभीषण काळे, नवनाथ अनिल शिंदे, राहुल अनिल शिंदे, बालाजी माणिक काळे व दत्ता हिरा पवार अशी आरोपींची नावे असून हे सर्व वेगवेगळ्या ठिकाणचे सराईत गुन्हेगार असल्याचे निष्पन्न झाले.
आरोपींकडून लोखंडी धारदार तलवार, स्टीलचा रॉड, चार मोबाईल फोन तसेच दोन पिकअप वाहने असा तब्बल 10 लाख 89 हजार रुपयांचा मुद्देमाल जप्त करण्यात आला. आरोपी हायवेवर वाहन अडवून जबरी लुटमार करण्याच्या तयारीत असल्याचे स्पष्ट झाले.
आरोपींच्या गुन्हेगारी पार्श्वभूमीची तपासणी केली असता त्यांच्यावर दरोडा, जबरी चोरी, वाहन चोरीसह गंभीर स्वरूपाचे अनेक गुन्हे दाखल असल्याचे उघड झाले. त्यामुळे हे टोळके पुन्हा एकदा मोठा गुन्हा करण्याच्या तयारीत असल्याचे पोलिसांनी स्पष्ट केले.
या प्रकरणी पोलीस ठाणे कळंब येथे गुन्हा रजिस्टर नंबर 04/2026 अन्वये बीएनएस कलम 310(4), 310(5) तसेच शस्त्र अधिनियम कलम 4 व 25 अंतर्गत गुन्हा दाखल करण्यात आला आहे.
ही धडक कारवाई पोलीस अधीक्षक रितू खोखर व अपर पोलीस अधीक्षक शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहायक पोलीस निरीक्षक सचिन खटक, पोलीस अंमलदार विनोद जानराव, नितीन जाधव, बबन जाधव, अमोल निंबाळकर, दयानंद गादेकर, बळीराम शिंदे, अशोक ढगारे, पुष्कर गांगळे, चापाह महबूब अरब व प्रकाश बोईनवाड यांच्या पथकाने यशस्वीपणे पार पाडली.