वाशी (प्रतिनिधी)
गावातील कामे जिल्हा नियोजन समितीतून मंजूर करून देतो, अशी खोटी हमी देत एका शेतकऱ्याची तब्बल ₹५,९५,००० ऑनलाईन फसवणूक केल्याची धक्कादायक घटना उघडकीस आली आहे. या प्रकरणी वाशी पोलीस ठाण्यात आरोपीविरुद्ध गुन्हा दाखल करण्यात आला आहे.
प्रशांत सतिश नाईकवाडी (वय ३५, रा. भुम) यांनी दिलेल्या फिर्यादीवरून गणेश सतिश चव्हाण (रा. पाथरुड, ता. भुम, जि. धाराशिव) याच्याविरुद्ध कारवाई करण्यात आली आहे.
दिनांक १३ जानेवारी २०२५ ते ४ फेब्रुवारी २०२५ या कालावधीत चव्हाण याने धाराशिव जिल्ह्याचे पालकमंत्री माझ्या ओळखीचे आहेत” असे सांगून फिर्यादी नाईकवाडी यांचा विश्वास संपादन केला. गावातील केलेली कामे दाखवून जिल्हा नियोजन समितीतून शासकीय कामे मंजूर करून देतो, असे सांगत वेळोवेळी एकूण ५ लाख ९५ हजार रुपये ऑनलाईन घेतले. मात्र प्रत्यक्षात कोणतेही शासकीय काम मंजूर करून दिले नाही.
यानंतर फिर्यादी यांनी पैसे परत मागितले असता आरोपीने त्यांना जिवे ठार मारण्याची धमकी दिली. अखेर या फसवणुकीला कंटाळून नाईकवाडी यांनी २८ सप्टेंबर २०२५ रोजी वाशी पोलीस ठाण्यात तक्रार नोंदवली.
या प्रकरणी पोलिसांनी भारतीय दंड विधान कलम ३१८(४), ३५१(२) अन्वये गुन्हा दाखल करून पुढील तपास सुरू केला आहे.
