तुळजाभवानी मातेच्या चरणी सुरांची भक्ती अर्पण

तुळजापूर
प्रसिद्ध गायक व संगीतकार अजय गोगावले यांनी आज सहकुटुंब श्री तुळजाभवानी मातेचे भक्तिभावाने दर्शन घेतले. पहाटेच मंदिरात दाखल होत त्यांनी देवीच्या चरणी ओटी भरली, हात जोडून मनोभावे प्रार्थना केली आणि पारंपरिक पद्धतीने कुलधर्म-कुलाचार पार पाडले. मातेच्या चरणी नतमस्तक होत त्यांनी आपल्या जीवनातील प्रत्येक यशात मातेचे आशीर्वाद असल्याची भावना व्यक्त केली.

दर्शनावेळी मंदिर परिसर भक्तिरसाने भारून गेला होता. देवीची आरती सुरू असताना वातावरण पूर्णतः आध्यात्मिक झाले होते. अजय गोगावले यांच्यासोबत त्यांचे कुटुंबीयही उपस्थित होते. सर्वांनी भक्तीभावाने देवीचे दर्शन घेतले.

दर्शनानंतर श्री तुळजाभवानी मंदिर संस्थानच्या वतीने तहसीलदार तथा व्यवस्थापक (प्रशासन) माया माने यांनी मातेची प्रतिमा व महावस्त्र देऊन त्यांचा सन्मान केला. यावेळी मंदिर संस्थानचे अधिकारी आणि कर्मचारी मोठ्या संख्येने उपस्थित होते.

अजय–अतुल या जोडीतील अजय गोगावले यांनी आपल्या संगीतसेवेतून लाखो भाविकांच्या मनात भक्तीचा जागर निर्माण केला आहे. त्यांच्या सुरांतून देवीमातेची महती आणि भक्तीभाव नेहमीच अनुभवायला मिळतो.

तुळजाभवानी मातेच्या चरणी नतमस्तक होत अजय गोगावले यांनी “मातेचा आशीर्वाद सदैव आमच्यावर राहो” अशी प्रार्थना केली.