कळंब शहरात चोरट्यांनी पुन्हा एकदा पोलिसांना आव्हान दिलं आहे. छत्रपती शिवाजी महाराज चौक ते भाजी मंडई या गर्दीच्या मार्गावर असलेल्या हौसलमल बियर शॉपीच्या गोडाउनची पत्र्याची खोली उचकटून चोरट्यांनी चोरी केल्याची घटना घडली आहे.
चोरट्यांनी एक-दोन नव्हे तर तब्बल 78 बियर बॉक्स असा 1 लाख 82 हजार 520 रुपयांचा माल उचलून नेला. घटनेची वेळ 12 नोव्हेंबर रात्री 10.30 ते 13 नोव्हेंबर सकाळी 10.30 अशी मोठी असल्याने परिसरात खळबळ उडाली आहे.
फिर्यादी रंजित रोहीदास हौसलमल यांनी 18 नोव्हेंबर रोजी कळंब पोलीस ठाण्यात तक्रार दिली असून पोलिसांनी कलम 331(4), 305 अन्वये गुन्हा दाखल केला आहे.
गोडाउनच्या आसपासचे सीसीटीव्ही, हालचाली आणि संशयितांचा मागोवा घेण्याचे काम वेगाने सुरू आहे. चोरट्यांनी इतक्या मोठ्या प्रमाणात बॉक्स हलवले कसे? कोणती वाहनं वापरली? कुणाची डोळ्यात न भरता हा माल बाहेर कसा गेला? या प्रश्नांमुळे तपास अधिक गुंतागुंतीचा बनला आहे. कळंबमध्ये सलग वाढत असलेल्या चोरीच्या घटनांमुळे व्यापाऱ्यांमध्ये भीतीचं वातावरण निर्माण झालं आहे. पोलीस तपासाचे धागेदोरे कुठे जातात याकडे सर्वांचे लक्ष लागले आहे.
