भुममध्ये व्यावसायिकाला 13 लाखांचा गंडा,

आर्थिक अडचण सांगून फसवणूक; खोट्या प्रकरणाची धमकीही

भुम
भुम शहरातील एका व्यावसायिकाला आर्थिक मदतीच्या बहाण्याने तब्बल 13 लाख 15 हजार रुपयांचा गंडा घालण्यात आल्याचा प्रकार उघडकीस आला आहे. या प्रकरणी भुम पोलीस ठाण्यात आरोपीविरुद्ध फसवणूक, विश्वासघात आणि धमकी देण्याचे गंभीर गुन्हे नोंदविण्यात आले आहेत.

पोलिसांनी दिलेल्या माहितीनुसार, प्रसाद उर्फ पंकज शिवाप्पा उंबरे (रा. रथ गल्ली, भुम) या व्यक्तीने 20 नोव्हेंबर 2021 ते 27 ऑक्टोबर 2022 या कालावधीत पोपट पिंटु मच्छिंद्र भारती (वय 49, रा. आलमप्रभु रोड, गालीब नगर, भुम) या व्यावसायिकाकडून व्यवसायातील आर्थिक अडचण असल्याचे सांगून वेळोवेळी एकूण 13 लाख 15 हजार रुपये घेतले.

परंतु आरोपीने ठरल्याप्रमाणे पैसे परत केले नाहीत. उलट फिर्यादीला खोट्या प्रकरणात अडकवण्याची धमकी देऊन मानसिक त्रास दिला. या घटनेमुळे फिर्यादी भारती यांनी 25 ऑक्टोबर 2025 रोजी भुम पोलीस ठाण्यात तक्रार दाखल केली.
तक्रारीनुसार पोलिसांनी आरोपी उंबरेंविरुद्ध भारतीय दंड संहिता कलम 420 (फसवणूक), 406 (विश्वासघात) आणि 506 (धमकी) अंतर्गत गुन्हा दाखल केला आहे. पुढील तपास पोलीस निरीक्षकांच्या मार्गदर्शनाखाली सुरू असून आरोपीविरुद्ध कायदेशीर कारवाई सुरू आहे.